"Joehoe, binnen komm', wij gaot eten!"
Het is al zes uur en nog speul ik buuten.
Maor nou röp mien moe en ik heb ook 'n honger!
O nee hè, wat ruuk ik? O bah! Wij eet spruten!!!
Ik hol van bloemkool, andievie, spinaozie,
spaghetti of riest eet wij ok wal ies.
't Liefst he'k patat, of pannekoeken,
Maor jakkes, spruten, dat vin'k zo vies!
En allemaol lust ze 't, mien breurtie, mien zussies,
Gienien die mij begriepen kan.
En ik mùt er van eten, mien bordtie leeg,
O, ze griezelt mij toe, daor in die pan!
A'j buuten speult hebt, dan lus ie al wat:
De maage giet mij te keer.
De erpel en 't vleis, dat lust mij wal,
Maor dan zie'k die spruten weer.
Veurzichtig prik ik er ien an de vork:
Ogen dicht, sloeken... en vort!
As ik later groot bin, dan ku'j 't wal raoden:
Nóóit meer spruten op mien bord!!!
schriefster: Hermien Boesjes