Tattoo - Rapporten

Eigenlijk vind ik, dat ik wel een goed rapport heb dit jaor. Ik heb zölfs een dikke 9 op gym­nastiek. Ik hold niet van rekenen mar een 6 is gien onvoldoende. Daor kuj toch met veur de dag kommen? Ik heb ok een 6 veur wereld­oriëntatie en een 6 veur de Nederlandse taol. Tiekenen vind ik altied mooi um te doen, daor­um heb ik een dikke 8. Eigenlijk vind ik, dat ik wel een goed rapport heb dit jaor. Een 9 en een 8 en verder almaol zessen.

Natasja hef heur rap­port tussen de mid­dag al an heur pap en mam laoten zien. Zij hef der gien 9 en gien 8 op staon. Wel een hieleboel zeuvens. Gien enkele onvol­doende, zölfs gien enkele 6. 'Je hebt een goed gemid­delde' hef heur pappe zegd, 'en ik bin dik tevree met je.'

Vanaovend gaot wij barbecuen in de tuun. Opa en oma komt ok en Natasja met heur pap en mam. Pappe was al gaangs met het klaorzetten van de tuunstoelen. 'Alsjeblieft, hier is mien rapport' zee ik trots. Neisgierig bladerde hij der deur... 'Wel veul zessen. Had dat niet wat beter kund?' mom­pelde hij. 'Je gemiddelde van je kerstrapport lag hoger.' Wat flauw! Hoe kun hij nou zo ofgeven op dit mooie rapport? 'Hej de 9 en de 8 hiel­maol niet zien?' wees ik hum de ciefers an. 'Tja, een 9 en een 8 veur gymnastiek en tiekenen... maar met die vakken schup ie het ok niet wied in de wereld.' Van chagrijnigheid rende ik de trap op naor mien kamertie.

Beneden heurde ik lachen en lawaai. Opa en oma zaten al op het terras bij de barbecue. 'Hé, lekker barbeknoeien!' heurde ik hum roepen. Opa brengt altied een bult lawaai met zuk met. Met een zucht pakte ik mien rapport. Ik mus het heur wei laoten zien. Wat zul ik de pé in hebben as zij het ok of zullen kraken. 'Laot gauw die ciefers es zien mien jong', zee opa en griste het boekie uut mien haanden. Hij gung met zien vinger alle regels bij langs. 'Ja, ja...' zee hij. Meer niet. Oma keek met hum met en trok een ernstig gezicht. 'Ja, ja...' zee zij ok. Ongeduldig pakte ik mien rapport weerum. 'Nou, wat vind je der van. Is het ja, ja... wat goed. Of is het ja, ja... wat slecht?'

Zij mussen lachen. 'Het is ja, ja... wat een schitterend rapport is dat! Ik zal je wat vertellen. Je pap is nog nooit met een 9 of met een 8 in huus kommen. Hij har wel altied een goed gemiddelde, maar nooit es een uutschieter. Ik vind dit een merakels mooi rapport! Ik zag dat mien pappe zien wenkbrauwen fronste.

Natasja kwam met heur pap en mam. Wij reus­terden het vleis op de barbecue en de pappes drunken bier. 'Had je dochter ok zo'n mooi rap­port?' zee mien va tegen Natasja's pappe. 'Ik bin dik tevree met heur... zij hef een goed gemiddelde. Dat is meer as dat ik van mijzdf kan zeggen. Ik har geregeld een onvoldoende.' Mien pappe proostte met hum. De bierflessies knalden tegen mekaar. 'Dat mut toch kunnen, geregeld een onvoldoende. En je hebt het toch wied schupt in de wereld!' heurde ik mien eigen pappe zeggen... Grote mensen! Kun jij der wies uut worden?